My naam is Jaap Lourens, radio operateur vir Pel.3 D- Komp, 6 SAI, soos in 1981 - 83.
Weideman en ek het saam in 1980 aan die Hoerskool Florida gematrikuleer, en daarna saam opgeroep in 1981 vir diensplig te 8 SAI, Upington, waar ons Basies en vakopleiding voltooi het, en laat'81 is ons na 6 SAI op Grahamstad verplaas, as 'n kompanie in geheel.
Vroeg in 1982 is ons in Ovamboland, 52 Battaljon, Sektor 10 te Okalongo ontplooi. Laat '82 het ons vir 'n paar dae tuisverlof gehad, en by ons terugkeer in Ovamboland, soos gewoonlik weer 'n week of twee op Oshivelo opleiding gedoen, voor ons na ons volgende basis, Concor op die pad na Ruacana ontplooi sou word.
Ons kompanie bevelvoerder was 'n Maj. Shoam,'n ongure man, wat min tyd vir sy troepe gehad het, en hy het vooruit, teen hoe spoed vertrek, om eerste die basis te bereik. Die res van die konvooi Buffels het teen hoe spoed moes ry om te probeer by bly, en soos gewoonlik was niemand van ons vasgegordel nie.
Ons Buffel het 'n treiler met kit agter aan gehak gehad, en op 'n gedeelte van die pad wat geteer was, was daar klein stormwater bruggies, vol sand. "n Slaapsak het van ons treiler geval, en die Buffel drywer agter ons het skerp gerem. Die Buffel agter hom was te naby, die een met Weideman en die ander seksie-leiers op, wat ook nie vasgegordel was nie.
Die gevolg was dat hulle voertuig ge-knipmes het, en deur die stof kon ek die Buffel omtrent 4m hoog deur die lug sien trek. Die voertuig het reg op Weideman se kop geval, en hy is op slag dood. Van die ander seksie- leiers is ook erg beseer. Hoe ons dit gedoen het weet ek nie, maar ons het die Buffel opgetel, en ons het sy liggaam uitgesleep.
Vandag 22 jaar na die voorval, onthou ek dit steeds baie goed, en ek dink gereeld aan ons makkers wat nooit terug gekom het, gestudeer, getrou en kinders kon he, wat eendag vir hulle seuns stories van die Grensoorlog kon vertel nie. Ook aan die 100de ander wat ek nie eers geken het nie, maar ons almal wat bereid was om vir ons land bloed te stort, is ons almal Broers.
Ek salueer julle almal, al het ek julle nie geken nie, maar sal julle altyd onthou. Ek en duisende ander was gelukkig om lewendig terug te kom, maar tog, in ons lewens, was dit een ondervinding wat geen geld ooit sou kon koop nie. |
![South African Roll of Honour: View Person Information [Weideman, A.C., L-Cpl] (1639)](assets/banner/view_person.png)
